Пабло Пикассогийн бүтээлүүд 110 сая ам.долларын үнэд хүрчээ
Лас Вегасын нэгэн зочид буудлын хананд 20 гаруй жилийн турш өлгөөтэй байсан Пабло Пикассогийн 11 бүтээл өнгөрөгч бямба гарагт болсон дуудлага худалдаагаар бараг 110 сая ам.доллароор зарагджээ.
Беллажио зочид буудлын Пикассо рестораны үзүүлэн байсан эдгээр бүтээлийг "MGM Resorts" компани эзэмшиж байсан юм. Тэгвэл тус компани дүрслэх урлагийн цуглуулгынхаа олон талт байдлыг сайжруулахын тулд Пикассогийн бүтээлүүдийг зарахаар шийдсэн аж. Үүний хүрээнд, тус зочид буудал нь хөгжиж буй улс орнуудаас гаралтай уран бүтээлчид болон нийгмийн цөөнх, эмэгтэйчүүдийн уран бүтээлүүдийг цуглуулгадаа нэмэхээр зорьж байгаа аж.
Дуудлага худалдаагаар Испани зураачийн есөн уран зураг болон хоёр шаазан эдлэлийг зарсан байна. Энэхүү цуглуулга нь 50 гаруй жилийн хугацаанд бүтсэн урлагийн бүтээлүүдээс бүрджээ. Америкийн казиногийн магнат, Беллажио зочид буудлын эзэн асан Стив Винн уг цуглуулгыг 20 гаруй жилийн өмнө эхлүүлж байсан юм.
Энэ удаагийн дуудлага худалдаагаар Пикассогийн 1938 онд зурсан "Улаан-улбар шар өнгийн берет өмссөн эмэгтэй" гэх нэртэй уран зураг хамгийн өндөр үнэ буюу 40.5 сая ам.долларт хүрчээ.
Эх сурвалж: BBC
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.