М.Аллен нутгийн "дэвжээндээ" 147 оноо авлаа

Мэргэжлийн снукер биллиардын чансааны оноо олгох "Northern Ireland Open-2021" тэмцээн эхэллээ. 

Зургаа дахь удаагаа зохион байгуулагдаж буй "Northern Ireland Open" тэмцээний сүүлийн гурван жил (2018, 2019, 2020 он) шигшээд дэлхийн чансааг тэргүүлэгч Жадд Трамп болон дэлхийн зургаан удаагийн аварга домогт Ронни О Сулливан нар тунан үлдсэн байдаг. Хамгийн сонирхолтой нь Жадд Трамп гурван жил дараалан Ронни О Сулливан аваргыг шигшээд хожихдоо яг ижил хожлын харьцаагаар буюу 9:7 гэсэн харьцаагаар хожиж байлаа. 

Энэ сарын 9-ний өдөр эхэлсэн тус тэмцээнд 128 тамирчин өрсөлдөж урьдчилсан шатнаас 64 тамирчин тодроод байна. Урьдчилсан тоглолтуудын гол дуулианаар Марк Аллен нутгийн "дэвжээнээ" снукер биллиардын хамгийн өндөр оноо болох 147 оноог нэг өрөгт авлаа. Энэ нь түүний карьерийн хоёр дахь удаагийн 147 авч буй тохиолдол болж байгаа ба одоогоос таван жилийн өмнө UK Championship тэмцээнд тэрээр анх удаа 147 оноо авч байжээ. Тоглолтын дараа Марк Аллен: "Миний карьерийн хамгийн сайхан мөчүүдийн нэг энэ байлаа. Өөрийн нутгийн тэмцээндээ үүнийг хийнэ гэдэг маш их таашаалыг надад өглөө. Би сургуулилт дээр маш олон удаа 147 оноог авдаг том тэмцээн дээр үүнийг хийнэ гэдэг багагүй сандаргаж байна шүү" хэмээн ярьсан байна.