"Эмми-2021": "The Crown" болон "Ted Lasso" гол шагналуудыг авав

АНУ-ын Лос Анжелес хотод болсон 73 дахь удаагийн Эмми шагнал гардуулах ёслолын гол шагналуудын эздээр "Netflix"-ийн "The Crown" болон "Apple TV"-гийн "Ted Lasso" цувралууд тодорчээ.

Их Британийн хааны гэр бүлийн нууцлаг амьдралыг дэлгэсэн "The Crown" цуврал Шилдэг драмын цувралын шагнал авсан төдийгүй тус бүтээлд тоглосон Гиллиан Андерсон, Оливиа Колман, Жош О’Коннор, Тобиас Мензиес нар драмын төрлийн Шилдэг гол дүрийн жүжигчин болон Шилдэг туслах жүжигчний шагналуудыг бүгдийг нь хүртсэн юм.

Андерсон "The Crown" цувралд Маргарет Тэтчерийн дүрд тоглож, О'Коннор Ханхүү Чарльзын дүрийг бүтээсэн бол Мензиес Эдинбургийн гүнгийн дүрийг амилуулсан билээ. Тус алдарт цуврал нь мөн Шилдэг найруулагч болон Шилдэг зохиолчийн шагналыг хүртжээ.

Харин "Ted Lasso" цувралын гол дүрийг бүтээсэн Жэйсон Судейкис хошин шогийн төрөлд Шилдэг гол дүрийн жүжигчнээр шалгарсан байна. Тэрээр уг шагналыг гардан авах үеэрээ "Энэ цуврал бол гэр бүл, ментор, багш, нэг багийн андуудын тухай түүх. Би ч мөн эдгээр зүйлгүйгээр энэ өндөрлөгт гарж чадахгүй байсан" хэмээн хэлжээ.

Түүний хамтран тоглогчид болох Их Британийн жүжигчид Ханна Ваддингэм, Бретт Голдштейн нар мөн хошин шогийн төрлийн Шилдэг туслах дүрийн жүжигчдээр тодорсон байна.

Өнгөрсөн жил "Apple TV"-ээр анх гарч эхэлсэн "Ted Lasso" нь АНУ-ын хөлбөмбөгийн дасгалжуулагч Их Британи руу нүүж, Премиершипийн багийг дасгалжуулах болсон тухай өгүүлдэг юм.

Тэгвэл богино цувралын Шилдэг эмэгтэй жүжигчний шагналыг Кейт Уинслет "Mare of Easttown"-д бүтээсэн дүрээрээ хүртсэн бол Шилдэг эрэгтэй жүжигчнээр Эван МакГрегор шалгарчээ. Түүнчлэн "Mare of Easttown" цувралын жүжигчид Эван Питерс болон Жулианна Николсон нар Шилдэг туслах жүжигчдээр тодорсон байна.

Цар тахлын улмаас өнгөрсөн жилийн арга хэмжээ цахим хэлбэрээр зохион байгуулагдаж байсан бол энэ удаагийн шагнал гардуулах ёслолд олон телевизийн од биечлэн оролцжээ.

Эх сурвалж: BBC

Орчуулагч: Г.Энхсаруул