Шүүхийн ёс зүйн хороо 2021 оны гуравдугаар сарын 22-ны өдрийн хуралдаанаараа Сүхбаатар дүүргийн Эрүүгийн хэргийн анхан шатны шүүхийн шүүгч Х.Идэрийг ёс зүйн ноцтой зөрчил гаргасан гэм буруутай хэмээн үзэж, шүүгчийн албан тушаалаас огцруулах сахилгын шийтгэл ногдуулж байлаа.

Гэвч Х.Идэр шүүгч ёс зүйн хорооны уг шийдвэрийг эс зөвшөөрч, Захиргааны хэргийн давж заалдах шатны шүүхэд хандсан тул түүнийг огцруулсан ёс зүйн хорооны шийдвэр түр түдгэлзжээ.

Улмаар хууль бусаар биеэ үнэлэлт зохион байгуулсан, шүүгчийн нэр хүндийг гутаасан хэмээн албан тушаалаасаа огцорсон Хувьтөгөлдөрийн Идэр шүүгчийн ажилдаа эргэн томилогдож, шүүн таслах ажлаа хийж байгаа болохыг та бүхэн доорх баримтаас харж болно.  

Сүхбаатар дүүргийн эрүүгийн хэргийн анхан шатны шүүхийн шүүх хуралдааны хуваарь

Бид Х.Идэр шүүгчийг огцруулсан байтал тэрбээр яагаад шүүн таслах ажлаа одоо хийсээр байгаа асуудлыг ШЁХ-ны нарийн бичгийн дарга Н.Ганбаатараас асуухад “Шүүхийн ёс зүйн хорооны шийдвэр яг одоо Захиргааны хэргийн давж заалдах шүүх дээр хянагдаж байгаа. Уг асуудлыг хэзээ хэлэлцэх тов мэдээлэл одоогоор ирээгүй байна. Захиргааны хэргийн шүүхийн эцсийн шийдвэр гарах хүртэлх хугацаанд ШЁЗ-н хорооны шийдвэр түдгэлзсэн” гэх хариуг өглөө.

---