Н.Төгсцогт "Би ялна гэдэгтээ итгэлтэй байна"

Сонирхогчдын боксын олимп, дэлхийн аваргын мөнгөн медальт МУГТ Н.Төгсцогт мэргэжлийн 14 дэх тулаандаа ороход нэгэнт бэлэн болжээ. 

Мэргэжлийн карьерийнхаа турш 13 тулаанд орж 12 ялалт байгуулахдаа есөн өрсөлдөгчөө хүнд цохилтоор буулган авсан МУГТ Н.Төгсцогтын энэ удаагийн өрсөлдөгч нь 15 тулаанд орж нэг ч ялагдаж үзээгүй Крис Кольберт байх юм.

Тулаан маргааш буюу долоодугаар сарын 4-ний өглөө Улаанбаатарын цагаар 09:00 цагт болох ба МУГТ Н.Төгсцогт мэргэжлийн боксын WBA холбооны түр аваргын бүсний төлөө тулалдах болно. 

Дөнгөж сая тамирчид жингээ үзүүлж "нүүр тулсан" байна. 

Тулааны өмнөх хэвлэлийн бага хурлын үеэр МУГТ Н.Төгсцогт: "Хэдийгээр богино хугацаанд шийдвэр гарган өөр холбоонд, дээд жиндээ тулалдах гэж байгаа ч би өөрийн хурд, хүч, ур чадвартаа итгэлтэй байна. Би ялах гэж энд ирлээ" хэмээсэн бол түүний өрсөлдөгч К.Кольберт: "Би доод жингийнхээ тамирчинд ялагдана гэж бодохгүй байна. Энэ бол Ниссан болон Ламборгинигийн тулаан байх болно. Би Ламбо байна" хэмээн мэдэгджээ.