LIVE: Ц.Баатархүү: Бид зүгээр явж байгаа хүн дээр гүйж очиж, түлхэж унагахгүй

ЦЕГ-ын Хэвлэл мэдээллийн төвийн дарга, хурандаа Б.Баатархүү:

-Сүхбаатарын талбай руу хэвлэл мэдээллийн байгууллагыг нэвтрүүлэхгүй байх ямар ч үүрэг, даалгавар дээрээс өгөөгүй. Гол нь халдвар, хамгаалалтын дэглэмээ мөрдөөд цөөн цөөнөөр нь оруулж байгаа.

-Цагдаагийн алба хаагч сэтгүүлчийн биед халдсан үйлдэл гарсан?

-Цагдаа сэтгүүлчийг цохиж унагаагүй. Шалгалт хийгдэж байна. Мэдээж та бүхэнд мэдээлэл олж, олон нийтийг мэдээллээр хангах нь чухал. Бид нар олон нийтийн аюулгүй байдлыг хангах, хэв журмын хамгаалалт хийх нь мөн чухал, бидний үүрэг. Үүнийхөө төлөө бид хоорондоо ойлголцоод явах ёстой.

-Цагдаагийн алба хаагчид үүрэг биелүүлж байна гээд хүний биед хүрч, түлхэх нь хэр ёс зүйтэй үйлдэл юм бэ?

-Би тухай сэтгүүлчийг буруутгаагүй. Аль алиныг нь хэлж байна. Цагдаагийн алба хаагчид хамгаалалтын бүс татаад зогсож байхад "орно, нэвтэрнэ" гэж дайраад байхаар харилцаа үүснэ. Гэхдээ бид зүгээр явж байгаа хүнийг гүйж очиж, түлхэж унагахгүй.

-Хамгаалалт гаргаж, зам хааж боох тусам иргэдийн дунд бухимдал үүсгэж байна. Түүнийхээ оронд өлсгөлөн зарлаж байгаа гишүүдээ тарааж болдоггүй юм уу?

-Бид хууль бус өлсгөлөн, суулт зарлалаа гэж албан шаардлага, мэдэгдлээ хүргүүлсэн. Тэр хүмүүсийн гаргаж буй үйлдэлтэй холбоотойгоор олон нийтийн бөөгнөрөл үүсэхээс л сэргийлж ажиллаж байна.