АНУ-ын "McDonald's Corp" компани энэ сард Техас мужийн зоогийн газрууддаа 25 мянган шинэ ажилтан авахаар болсноо өнгөрөгч пүрэв гарагт мэдэгджээ.

Тус компани нь түргэн хоол бэлтгэх багийн гишүүд болон удирдах албан тушаалын ажилтнуудыг энэ сарын 13-15-ны хооронд гурван өдрийн турш үргэлжлэх арга хэмжээний үеэр элсүүлж авах аж. Өнгөрсөн жил коронавирусийн цар тахлын улмаас АНУ-ын зоогийн газрууд хэдэн долоо хоногийн турш зөвхөн авч явах болон хүргэлтийн үйлчилгээг санал болгож байсан бөгөөд үйл ажиллагаа нь эргээд хэвийн болсны дараа "McDonald’s" компани 260 мянга орчим хүнийг шинээр ажилд авсан байна.

АНУ-д 14 мянга орчим түргэн хоолны газар эзэмшдэг энэхүү компани нь жил бүрийн зун улс орон даяар олон мянган шинэ ажилтныг ажилд авдаг бөгөөд ахлах сургуулийн сурагчид болон их сургуулийн оюутнуудыг ихээр татдаг байна.

Эх сурвалж: Reuters

---