Дэлхийн аваргуудын дуэлд Н.Робертсон илт илүүрхлээ

Мэргэжлийн снукер биллиардын шилдэг найман тамирчин өрсөлддөг "2021 Tour Championship" тэмцээний хагас шигшээ тоглолтууд эхэллээ.  

Хагас шигшээд Ронни О Сулливан, Н.Робертсон, М.Селби нарын дэлхийн аваргуудаас гадна Б.Хавкинс шалгараад байлаа. 

Урьд шөнө хагас шигшээ эхний тоглолтод дэлхийн гурван удаагийн аварга Марк Селби /дэлхийн чансааны №3/ аварга болон 2010 оны дэлхийн дэлхийн аварга Нейл Робертсон /дэлхийн чансааны №4/ нарын дуэл үзүүштэй сайхан боллоо. 

2020 оны English Open тэмцээнээс хойш тэд дөрөв дэх тэмцээнийхээ хагас шигшээд учраа таарч байгаа бөгөөд тэр бүрийд Нейл Робертсон аварга хожиж байна. Ихэвчлэн 6:5 буюу нэг тоглолтын илүүгээр хожиж байсан бол урьд шөнө 10:3 харьцаагаар бут ниргэлээ. 

Тоглолтын дараа Н.Робертсон: "Марк бид хоёр сайн найзууд. Өнөөдрийн хожигдол түүнд дараагийн удаа илүү их хичээх ёстойг ойлгуулсан түлхэц болно" хэмээн хэлжээ.

Хуваарь ёсоор өнөө орой хагас шигшээ дараагийн тоглолт болох ба домогт Ронни О Сулливан, Барры Хавкинстай тоглоно.