Сингапур улс 42,000 айлын ухаалаг-ногоон хот байгуулж байна

Сингапурын иргэдийн 80 хувь нь нийтийн орон сууцанд амьдардаг учир Засгийн газар тогтвортой хотын хөгжлийг бүтээх нь нэн тэргүүний хариуцлагатай ажил ажээ. Тиймээс эрх баригчид 42,000 айлын багтаамжтай таван дүүрэг бүхий эко-ногоон, смарт-ухаалаг Тенга нэртэй шинэ суурин байгуулахаар болжээ.

Тус шинэ суурин нь дэлхийн хоёрдугаар дайнаас хойш Сингапурын Засгийн газрын байгуулж байгаа 24 дэх суурин болох ажээ. Төвлөрсөн хөргүүрийн систем, автомат хог цуглуулагч, ил машингүй, нүүрстөрөгчийн хийн ялгарал хамгийн бага анхны суурин болно.

Ногоон байгууламж, олон нийтийн амарч зугаалах цэцэрлэгт хүрээлэн олноор байгуулах тул “ойн тосгон” ч гэж эрх баригчид нэрлэж байгаа юм. Эрт цагт тоосгоны үйлдвэр байж байгаад цэргийн сургуулилалтад ашиглаж байсан 700 га талбайг Сингапур хот-улсын анхны ногоон, ухаалаг суурин болгох гэж байна.

Тенга хотын автозам, машины зогсоол, худалдаа үйлчилгээний газруудыг хотын доор буюу газар доор байгуулахаар болжээ. Тиймээс явган зорчигчид аюулгүй хүрээлэн буй орчинд тав тухтай алхаж, дугуй унах боломжтой юм байна. Мөн орчин үеийн ухаалаг шийдлийг багтаахын тулд цахилгаан тээврийн хэрэгслийн зай хураагуур цэнэглэх газруудыг түгээмэл байршуулна гэжээ. Мөн хотыг байгуулахдаа өөрөө явдаг жолоочгүй тээврийн хэрэгслүүдэд зориулж зохион байгуулалтыг хийх юм байна.

Хэдийгээр Сингапур улс зургаан сая хүрэхгүй хүн амтай боловч нэг хүнд ноогдох дулаан ялгаруулалтын хэмжээгээр Их Британи, Хятад, Малайз зэрэг улсуудаас илүү байдаг ажээ. Халуун орны бүсэд багтдаг тул агаар цэвэршүүлэгч, сэрүүцүүлэгч ихээр ашигладаг ч шинэ хотод агаар сэрүүцүүлэгчийг ихээр хэрэглэхээс аль болох татгалзах юм байна. Тиймээс хүйтэн ус, нарны эрчим хүчээр ажилладаг сэрүүцүүлэгч зэргийг хотод байрлуулахаар төлөвлөжээ.

Үнийн хувьд 70 гаруй хувийг нь удаан хугацааны лийзингээр худалдаж авах боломжтой ба хоёр унталгын өрөөтэй орон сууц нь 108,000 сингапур доллар буюу 82,000 ам.долларын үнэтэй. Анхны орон сууц 2023 онд баригдаж дуусна.

Эх сурвалж: CNN