ОХУ-ын нийслэл Москва хотын төвд өнгөрөгч ням гарагт нэгэн эрэгтэй шатамхай шингэн ашиглан өөрийгөө шатааж, эмнэлэгт хүргэгдсэн болохыг орон нутгийн цагдаа нар мэдээлжээ.

Тус эрэгтэйг өөрийгөө галдан шатааснаас хойш ойр хавьд байсан цагдаагийн алба хаагчид болон гудамжаар өнгөрч байсан хүмүүс хэдхэн минутын дотор галыг унтраан, түүний амийг аварсан гэж Москвагийн цагдаагийн хүч мэдэгдэлдээ дурдсан байна. Мөн албаныхан түүнийг хувийн асуудлаас болж ийм үйлдэлд хөтлөгдсөн бололтой хэмээн дүгнэж байгаа юм.

Уг хэрэг гарах үеэр Москва болон Оросын олон арван бусад хотод мянга мянган хүн жагсан, Кремлийн шоронд хоригдож буй сөрөг хүчний удирдагч Алексей Навальныйг суллахыг шаардаж байсан билээ. Гэвч одоогийн байдлаар тус эрэгтэйн өөрийгөө шатаасан явдал нь эсэргүүцлийн жагсаалуудтай холбоотой гэх баримт байхгүй байна.

ОХУ-д үүнтэй ижил төстэй хэрэг өнгөрсөн оны аравдугаар сард гарч байжээ. Оросын нэгэн эмэгтэй сэтгүүлчийн Нижний Новгород дахь орон сууцад цагдаа нар нэгжлэг хийсний дараа тэрээр Дотоод хэргийн яамны орон нутгийн хэлтсийн үүдэнд өөрийгөө шатааж, амиа алдсан байна.

Эх сурвалж: Reuters

---