LIVE: БЗД-ийн 16-р хорооны зургаан байрнаас халдвар илэрсэн тул тусгаарлажээ

Баянзүрх нэгдсэн эмнэлэгт коронавируст “Ковид-19” халдварын голомт үүссэнтэй холбогдуулан Улсын онцгой комиссоос тус дүүрэгт 2020 оны 12 дугаар сарын 21-ний өдрөөс эхлэн 30-ны өдрийг дуустал 70.000-80.000 иргэнийг ПГУ /PCR/-ын шинжилгээнд хамруулж, тандалт хийхээр шийдвэрлэсэн.

БЗД-ийн 16-р хорооны засаг дарга С.Ганчимэг: Манай хороо 6089 өрхтэй. Өрх бүрийн гишүүдийг хамруулах ажлыг хорооны Засаг дарга хариуцаж байгаа. Иргэдийн хувьд зарим нь олон нийтийн газраар яваагүй тулд шинжилгээ өгөхгүй. Шинжилгээ өгөх цэгээс халдвар авах тул очихгүй зэрэг хариулт өгч байна. Гэтэл дүүргийн Онцгой комиссоос шинжилгээ өгөх өрхийн тоо муу байгаа бол хороодын Засаг дарга нарт хариуцлага тооцно хэмээн шаардах хуудас явуулж байна.

Гурван хоногийн өмнө 44 сургууль дээр шинжилгээ өгсөн 507 иргэний шинжилгээний бар код устаж, иргэдээс дахин шинжилгээ авч байгаад иргэд гомдолтой байна. Энэ мэт иргэдийг хохироосон үйлдэлд хэн ч хариуцлага хүлээхгүй байгаад иргэд бухимдалтай байна.

Шинжилгээ өгсөн иргэн: Миний хувьд 44 сургууль дээр шинжилгээ өгөөд маргааш нь дахин намайг шинжилгээ өг хэмээн ХӨСҮТ-өөс утасдсан. Шинжилгээ өгөхөөр очих үед дотоод зохион байгуулалт тиймхэн санагдсан. Шинжилгээний бар кодоо гараар бичиж байсан нь хүмүүсийн шинжилгээг андуурах солих тохиолдол гарсан байх. Дахин очиж шинжилгээ өгөөд сөрөг гарсан. Халдвар тархахаас сэргийлж, шинжилгээ авч байгаа нь зөв. Гэхдээ зохион байгуулалт дээрээ цаашид анхаарч ажилламаар байна.

Баянзүрх дүүргийн 16 дугаар хорооны зургаан байрны иргэдээс коронавирусийн болон сэжигтэй тохиолдол илэрсэн. Ингээд дээрх зургаан байрны иргэд тусгаарлалтад байгаа юм.

Энэ сарын 27-нд “Гэгээ 39” байрны гурван ам бүлийн шинжилгээ сэжигтэй гарсан тул тус байрыг тусгаарлаад байна. Тусгаарлалтад байгаа оршин суугчдын хувьд нийгмийн маш олон асуудал гарч байна. Заримд нь үнэндээ хариулж чадахгүй тохиолдол гардаг. УОК, НОК-оос тусгаарлалтад байгаа иргэдийн асуудалд бүрэн дүүрэн хариулт өгөхгүй байна.

“Гэгээ 39” байрны оршин суугч: Өчигдөр хорооноос ярьж, хүнсний нөөц асуусан. Оршин суугчдад тодорхой мэдээлэл өгөхгүй байна. Манай байрыг хэдий хугацаанд хорих талаар мэдээлэл авмаар байна. ХӨСҮТ-ийн эмч нар ирж, айл өрхүүдээс шинжилгээ авсан байгаа. Ер нь айл өрхүүдэд юу болж байгаа талаарх мэдээлэл өгмөөр байна.