Олон нийтийн шүүмжлэлээс айсан гишүүд шилэн хаалтаа хог дээр хаяжээ

Хотын дарга Д.Сумъяабазар өөртөө зориулсан халуун хэмжигч болон метал илрүүлэгч өрөөнийхөө үүдэнд байршуулж, олны дургүйцлийг хүргэсэн. Түүнийг олон нийт амиа бодож, ёсзүйгүй үйлдэл гаргалаа хэмээн шүүмжилсээр буй.

Тэгвэл УИХ-ын гишүүд ч мөн амиа бодож, биеэ хоохойлжээ. Тэд чуулганы танхимд суудаг ширээн дээрээ хүн тус бүрээр өөрсдийгөө тусгаарласан шилэн хаалт хийсэн байх аж. Нэг үгээр эрхэм дарга нар “Би үхэхээр чи үх” гэх хандлагаа ийнхүү нийгэмд үзүүлж байгаа хэрэг.

Эрхэм дарга, сайдтанууд ийн өөрсдийгөө хамгаалж, амиа хоохойлж суухад эгэл жирийн иргэд эмнэлгийн коридорт дугаарлаж, автобусан дотроо чихэлдэж, юун коронагаас хамгаалах манатай байгаа.

Гэвч хотын даргыгаа олонд баалуулж буйг харсан эрхэм гишүүд олны хэл амнаас айсан бололтой шилэн хаалтаа өнөөдөр хуу татаж хаяжээ. Ингээд дарга нарын ямбанд зориулж хийсэн шилэн хаалтууд ордны коридороор нэг хөглөрч эхэлсэн байна. Харин уг ямбанд зориулж хэдэн төгрөг зарцуулаад ийн хог дээр хаях болсон нь одоогоор тодорхойгүй байна. Албан бус мэдээллээр нэг тус бүр нь 180 мянган төгрөг буюу нийтдээ 15 сая төгрөгийг уг шилэн хаалт авахад зарцуулсан аж.

Гэвч иргэд идэх хоол, түлэх түлээгүй шахам өдөр хоногийг аргацаасаар...