LIVE: Ж.Энхбат: Хотын дарга Д.Сумъяабазар өрөөнийхөө үүдэнд тусгай төхөөрөмж байрлуулсан

НИТХ дахь АН-ын бүлгийн ажлын албаны ахлах мэргэжилтэн Ж.Энхбат өөрийн цахим хуудастаа хэд хэдэн зургийг тайлбарын хамт тавьсан /үзэх/ нь өнөөдөр олны анхааралд өртөөд байна. Тэрээр "Хотын дарга Д.Сумъяабазар өрөөнийхөө үүдэнд халуун хэмжигч, метал илрүүлэгч гэх тусгай төхөөрөмж байрлуулсан. Энэ нь 35 000 евро буюу 200 сая орчим төгрөгийн үнэтэй байна. Энэ нь би өвдөж болохгүй. Улаанбаатар хотын иргэд өвдөж болно гэсэн увайгүй үйлдэл" хэмээн үзэж байгаагаа мэдэгдэв. 

НИТХ дахь АН-ын бүлгийн ажлын албаны ахлах мэргэжилтэн Ж.Энхбат: 

-Нэгэн иргэн надад "Хотын дарга өөрийнхөө өрөөний үүдэнд тусгай төхөөрөмж байрлуулсан байна" гэж мэдээлсэн. Мэдээллийн дагуу би өөрийн биеэр очиж зураг дарсан. Гэтэл энэ дагуу сая цагдаа нар ирж, намайг хууль бусаар бичлэг хийж, зураг авсан хэмээн Зөрчлийн хуулиар дуудаж байна. Удахгүй би баривчлагдаад явах байх. Сая төхөөрөмжүүдээ хураачихлаа гэнэ. Аягүй бол намайг эвлүүлэг хийсэн гэх байх. 

Уг нь би хууль зөрчөөгүй. Хотын дарга өөрөө үлгэр дуурайл үзүүлэх ёстой. Тусгай төхөөрөмжийг яагаад өөрийнхөө биш Хангарьд ордны үүдэнд байрлуулж болоогүй вэ? Яагаад эмнэлэгт байрлуулж болоогүй вэ? Би өвдөж болохгүй. Улаанбаатар хотын иргэд өвдөж болно гэсэн увайгүй үйлдэл үү? 

Би иймэрхүү төхөөрөмжийн үнэ судалж үзлээ. 35 000 евро буюу 200 орчим сая төгрөгийн үнэтэй байдаг юм байна. Шилэн данс хайж үзэхэд худалдан авалтын мэдээлэл байхгүй байна. Монгол улсын Ерөнхийлөгчөөс өгсүүлээд төсөв хэмнэе гэж ярьж байхад ийм байдлаар үрэлгэн зарлаж болдог юм уу? 

Энэхүү зураг болон мэдээлэл гарсны дараа Хотын дарга өөрийн албан ёсны жиргээн хаягаар "Туслахаа явуулж, хувийн мөнгөөрөө захиалж авсан юмаа. Ариутгагчтай суперыг нь Хангарьд, Тамгын үүдэнд маргааш тавиулна. Жич: бас хувиасаа. Болох уу?" гэжээ.