"iPhone 12" 5G хурдыг санал болгох хэдий ч АНУ-ын сүлжээнүүд үүнийг хүчрэхгүй

"Apple" компанийн "iPhone" ухаалаг гар утасны дараагийн загвар нээлтээ хийснээр 5G сүлжээ АНУ-ын зах зээлд өргөнөөр нэвтрэх боломж нээгдэж байна. Гэхдээ энэхүү шинэ үеийн хурд ихэнх хүмүүсийн хувьд хэрэгжихгүй гэнэ.

"iPhone 12" утас нь 5G буюу тав дахь үеийн утасгүй технологийг хэрэглэх боломжтой бөгөөд онолын хувьд уг сүлжээ нь одоогийн 4G утасгүй сүлжээнээс 10-20 дахин хурдан ажилладаг аж.

Тэгвэл Америкийн "Strategy Analytics" судалгааны компанийн дэд захирал Борис Методиев энэ талаар "Шинэ "iPhone" эсвэл бусад ямар ч 5G төхөөрөмжийг өнөөдрийн сүлжээнд ашиглах нь орон нутгийн тосгонд "Ferrari" унахтай адилхан байх болно. Тосгоны зам "Ferrari"-гийн хурдыг огт хүчрэхгүй тул цагт 200 миль хурдалж чадахгүй гэсэн үг" хэмээн тайлбарлажээ. 

АНУ-ын одоогийн 5G сүлжээнүүд ихэвчлэн бага зурвасын спектр ашигладаг бөгөөд энэ нь өндөр зурвасын спектрээс удаан боловч хол зайд илүү найдвартай байдаг байна. Үүний мэдэгдэхүйц хурдан хувилбар болох дунд зурвасын спектр ашиглалтад орж байгаа хэдий ч 2025 он гэхэд уг сүлжээ америкчуудын дөрөвний гуравт ч хүрэхгүй гэсэн судалгаа бий.

БНСУ болон БНХАУ-д илүү хурдан 5G сүлжээ илүү өргөн тархсан байдаг. Гэхдээ "Apple" компани 5G гар утасны хоёр дахь хувилбараа гаргаад буй "Samsung" болон ойрын үед борлуулалт нь эрс нэмэгдсэн "Huawei" зэрэг орон нутгийн брэндүүдтэй өрсөлдөх хэрэгтэй болох юм.

Эх сурвалж: Reuters