ВИДЕО: Аваргуудын Аварга Ронни О Сулливан

Снукер билльярдын "ManBetX Champion of Champions" буюу Аваргуудын аварга шалгаруулах нэр хүндтэй тэмцээн 2018.11.05-11 өдрүүдэд Англи улсын Рикох Аренад явагдаж өчигдөр шөнө Аваргуудын Аваргыг тодрууллаа.  

Снукер билльярдын дэлхийн аварга шалгаруулах тэмцээнээс ялгаатай нь уг тэмцээнд зөвхөн 16 шилдэг тамирчин оролцдог ба снукер билльярдын чансааны эхний 7 тамирчин, өмнө жилийн Аваргуудын аварга шалгаруулах тэмцээний аварга Ш.Мерфи нарын нийт 8 тамирчны эсрэг 8 тамирчин 4 хэсэгт хуваагдан өрсөлдсөн юм. 

Энэхүү тэмцээн нь анх 1978, 1980 онуудад зохион байгуулж байгаад дундаа тасалдсаны эцэст 2013 онд дахин зохиогдож эхэлсэн байдаг. 2013 оны тэмцээнд Англи улсын тамирчин домогт Р.О.Сулливан финалын тоглолтонд Англи улсын тамирчин С.Бингхамыг хожиж анхны аварга болсон билээ. Р.О Сулливаны хувьд дараагийн жил нь буюу 2014 онд мөн л Англи улсын тамирчин Ж.Трампыг финалд хожин Аваргуудын аварга болсон юм. 2014 оны уг тоглолт одоо ч снукер билльярд сонирхогчдын дахин давтан үзэх дуртай тоглолт болсон байдаг.

Энэ удаагийн тэмцээнд Англи улсын залуу тамирчин (энэ жил 26 настай) Кайрен Вилсон нь Ж.Трамп, М.Виллиамс, М.Аллен зэрэг шилдгүүдийг хожин финалд Ронни О Сулливантай аваргын төлөө тулалдахаар шалгарч үлдээд байлаа. Роннигийн хувьд снукер билльярд сонирхогчдын таамаглаж байсанчлан финалд төвөггүй гарч ирсэн юм. 

Урьд шөнө болж өнгөрсөн финалын "Тулаан" гал гарсан тоглолт байлаа. Тоглолтын явц дунд хэн түрүүлж аварга болох нь тодорхойгүй буюу ширүүхэн өрсөлдөөнтэй боллоо. Эцсийн мөчид Ронни 10:9 хожлын харьцаагаар Аваргуудын Аварга боллоо. 

Ийнхүү зургаа дахь удаагаа болж буй тэмцээнд домогт Пуужин хочит Ронни О Сулливан гурван удаа түрүүлээд байна.

Ронни О Сулливан болон Кайрен Вилсон нарын финалын тоглолт бүрэн эхээрээ: