LIVE: Ж.Эрдэнэбатын өмгөөлөгч Д.Батсүх: Эцсийн шийдвэрийг Дээд шүүх гаргана

УИХ-ын гишүүн Ж.Эрдэнбатын өмгөөлөгч Д.Батсүхээс дараах тодруулгыг авлаа. 

Өмгөөлөгч Д.Батсүх: 

-Хэдийгээр би шүүх хуралд суугаагүй ч Давж заалдах шатны шүүхэд гомдол гаргаад, үйлчлүүлэгчээ хамгаалаад явах эрх нь нээлттэй байгаа. Давж заалдана. Эцсийн шийдвэрийг Дээд шүүх гаргана. Гомдол гаргаад явсан тохиолдолд өмнөх шийдвэр түдгэлздэг. Өөрөөр хэлбэл, хуулийн хүчин төгөлдөр болоогүй шийдвэр гэж үздэг. 

Шүүгдэгч нарын гэм буруугийн тухайд маргаантай. Бүгд байр сууриа илэрхийлсэн. Шүүх гэм буруутай гэж үзсэн учир эрүүгийн хариуцлага оногдуулах нь тодорхой байсан. 

-Ж.Эрдэнэбат УИХ-ын гишүүн мөн үү. Түүний халдашгүй байдал хэвээр байгаа юу? 

-Энэ бол маргаангүй асуудал. СЕХ түүнд УИХ-ын гишүүний түр үнэмлэх олгосон. Түүнд халдашгүй байдал үүссэн. 

-Өмгөөлөгчгүй шүүгдсэн талаар? 

-Өмгөөлүүлэх эрхийг олон улсын хэмжээнд хүний үндсэн эрхэд тооцдог. Үүнийг ноцтой зөрчсөн. Өмгөөлөгч аваагүй тохиолдолд томилолтын өмгөөлөгч хүртэл гаргаж өгдөг. Гэвч энэ эрхийг шүүх үл ойшоосон. 

-Яагаад Х.Идэр шүүгчээс татгалзсан юм бэ? 

-Урьд нь гаргасан шийдвэрүүд нь хуулийг илт гажуудуулсан учир түүнээс татгалзсан. Холбогдох бүхий л газарт нь гомдол санал хүргүүлсэн байсан. Татгалзах хүсэлтийг нийт шүүгчийн хуралдаанаар шийдэх ёстой байтал ганцаараа шийдэж байсан. 

Энэ хэрэг бол Үндсэн хуулийн маш том зөрчлийг үүсгэж байна. Үндсэн хуулиар Монгол улсын төрийн эрх мэдлийн хуваарилалт, хэрэгжүүлэгч субьектуудын эрх үүрэг, харилцан тэнцвэртэй, харилцан хяналттай байх харилцааг тогтоож өгсөн байдаг. Гэтэл шүүх гэдэг субьект бусад субьект болох хууль тогтоох, гүйцэтгэх эрх мэдэл рүү Үндсэн хууль зөрчин халдаж эхэлж байгаа нь Монгол улсын нийгэм, улс төрийн харилцаанд ноцтой зөрчил үүсгэнэ.  

Одоо тэгээд гомдол гаргаж болох бүхий л субьектэд хандаад, шийдүүлэх гэж оролдоно доо.