LIVE: Б.Нарантуяа: Ж.Эрдэнэбатыг өмгөөлүүлэх эрхээр хангахгүй хүчээр шүүх гэж байна

УИХ-ын гишүүн Ж.Эрдэнэбат нарын таван хүнд холбогдох хэргийн шүүх хурал Сүхбаатар дүүргийн шүүхэд өнөөдөр /2020-07-02/ өглөөний 11:00 цагт эхэлсэн.

Дөнгөж сая шүүх хуралдаан түр завсарлаад эргэж орлоо. Завсарлагааны үеэр шүүх хуралдааныг даргалж буй шүүгч Х.Идэр "Шүүгдэгч Ж.Эрдэнэбатын зүгээс шинэ өмгөөлөгч авсан учраас хэргийн материалтай танилцах хугацаа олгохыг хүссэн. Мөн таслан сэргийлэх арга хэмжээг өөрчилж өгнө үү гэсэн хүсэлт гарсан. Шүүх бүрэлдэхүүн уг хүсэлтээс татгалзаж байна. Өөрөөр хэлбэл шүүх хуралдааныг хойшлуулахгүй, цааш үргэлжилнэ" гэсэн шийдвэрийг гаргав.

Шүүхийн энэхүү шийдвэртэй санал нийлэхгүй байгаагаа Сэлэнгийн ард иргэдийн төлөөлөл ийнхүү хэлж байна.

Сэлэнгэ аймгийн Засаг даргын орлогч Б.Нарантуяа: Бид шүүхийн шийдвэрт нөлөөлөхгүй гэж өглөөнөөс хойш тайван жагсаал хийлээ. Гэвч шүүгч сая захирамжаа танилцууллаа. Өмгөөлөгч 17-18 хуудас хавтаст хэрэгтэй танилцах хэрэгтэй шүү дээ. Гэтэл дөнгөж өнөөдөр өглөө сонгогдсон өмгөөлөгч яаж ийм богино хугацаанд материалтай танилцаж, өмгөөлөх юм бэ. Бидэнд хардах эрх бий. Шүүгч Ж.Эрдэнэбатыг өмгөөлүүлэх эрхээр хангахгүй, хүчээр шүүх гэж байгаад үнэхээр бухимдаж байна. Хүчээр ял тулгачих вий дээ гэсэн болгоомжлол маш их байна. 

УИХ-ын гишүүн Ч.Ундрам: Би энэ асуудлыг өчигдөр УИХ-ын чуулган дээр хөндөж тавьсан. Өнөөдөр өглөө УИХ-ын дэд дарга Т.Аюурсайхантай уулзаж энэ эсуудал дээр парламент ямар арга хэмжээ авч байсныг судаллаа. Хоёр бичиг УИХТГ-аас шүүхийн байгууллага руу явсан юм байна. Хариу ирсэн эсэх нь тодорхойгүй байна. Мөн Олон Улсын Парламентийн холбоо руу манай улсаас явсан бичиг ч байна. Хариу мөн ирээгүй байна. Энэ хариуны араас би явна. Сэлэнгийн сонголтыг ноцтойгоор зөрчиж байна гэж үзэж байна. Шүүхийг шударга шүүхийг шаардаж байна.