Коронавирусээр нас барагчдад зориулан хуучны булшнуудаа ухаж байна

Бразилын хамгийн том Сан Паулу хот коронавирусийн цар тахлын үеэр хуучин булшнуудыг ухан, оршуулгын газрууддаа халдвараар нас барсан хүмүүсийг оршуулах зай гаргаж байна.

Тус хотын оршуулгын албанаас өнгөрөгч баасан гарагт хийсэн мэдэгдлийн дагуу албаныхан дор хаяж гурван жилийн өмнө оршуулагдсан талийгаачдын ясыг ухан гаргаж, дугаарласан уутанд хийн, 12 металл саванд түр хадгалж байгаа аж. Дараа нь эдгээр савуудыг 15 хоногийн дотор хэд хэдэн оршуулгын газарт хүргэх гэнэ.

Латин Америкийн орнуудаас цар тахлын хамгийн хүнд цохилтыг аваад буй Бразил улсын Сан Паулу хот халдварын халуун цэгүүдийн нэг болоод байгаа бөгөөд 12 сая хүн амтай тус хотын таван мянга гаруй оршин суугч нас бараад байна. Гэвч эрүүл мэндийн олон мэргэжилтнүүд Бразил дахь халдварын оргил үе наймдугаар сард ирнэ гэж таамаглаж байгаа юм.

Сан Паулугийн хамгийн том оршуулгын газар болох Вила Формосагын ажилчид дөрөвдүгээр сард 1,665 хүн оршуулсан нь өмнөх сарынхаас 500 гаруйгаар өндөр үзүүлэлт гэнэ. Мөн коронавирус гарахаас өмнө тэд өдөрт 40 орчим булшийг ухан сулладаг байсан ба эдгээр нь гэр бүлийнхэн нь газрын төлбөрөө төлөхөө больсон хүмүүсийн булш байсан аж. Харин сүүлийн хэдэн долоо хоногт ажилчдын ухах булшны тоо хоёр дахин нэмэгджээ.

Оршуулгын газрын нэгэн ажилтан “Хүмүүс булш ухагч нарыг юунаас ч айдаггүй гэдэг. Бид коронавирусээс айж байна” гэв.

Эх сурвалж: The Associated Press