LIVE: 13 автомашин мөргөсөн жолооч ард түмнээсээ хандив хүсэв

Өлзийтийн шалган нэвтрүүлэх товчооны постын орчимд цeмeнт ачиж явсан том оврын ачааны автомашин осол гаргаж, 13 машин мөргөсөн ноцтой үйл явдал хоёр хоногийн өмнө гарсан талаар бид өмнө нь мэдээлсэн. 

Том оврын автомашин авто замын төлбөр хураах цэгийг мөргөсөн бөгөөд уг ослын улмаас 13 автомашин зам тээврийн осолд өртсөн юм.

Энэ осолд холбогдсон том оврын ачааны автомашины жолооч н.Ган-Очир /30 настай/ нь өмнө нь удаа дараа /15 удаа/ замын хөдөлгөөний дүрмийг зөрчиж байсан. Зам тээврийн осолд холбогдох үедээ жолоодож явсан тээврийн хэрэгсэл нь хуулийн хугацаанд техникийн хяналтын үзлэгт хамруулаагүй зөрчилтэй байсан. Уг ослын улмаас урьдчилсан байдлаар хоёр хүн гэмтсэн бөгөөд эд матeриалын хохирол их хэмжээтэй учирсан гэж Тээврийн цагдаагийн албанаас мэдээлж байсан юм. 

Уг ноцтой ослыг гаргасан жолооч н.Ган-Очир өнөөдөр лайв хийж, ард түмнээсээ хандив хүслээ. 

Тэрээр хэргийн талаар "Постон дээр хэд хэдэн машин дугаарлаж зогссон байсан учир эсрэг урсгал руу орсон. Гэвч өөдөөс нь дөрвөн машин гарч ирэн замын зүүн тал руу шахсан. Тэр үед тормоз нь ажиллахаа больсон учир нэг бол ШТС, нөгөө бол пост мөргөхөөс өөр аргагүй болсон учир постыг дайрсан" гэж ярилаа. 

Уг ослоос болж жолооч хүндэвтэр гэмтэл авчээ. Тэрээр өдгөө 13 автомашины хохирлыг төлөх болоод байгаа учир ард түмнээсээ чин сэтгэлийн хандив хүсч байгаагаа лайваараа уламжиллаа.