Энэтхэгт коронавирусийн үеэр цаг агаар хэт халж байна

Энэтхэг улсад коронавирусийн батлагдсан 150,000 гаруй тохиолдол бүртгэгдэж, 4,000 гаруй иргэн нас барснаар дэлхийд 10 дугаарт орж байна. Тус улсад цар тахлын эсрэг тэмцлийн хажуугаар цаг агаар хэт халж, царцааны нүүдэл ихэссэнээр ард иргэдэд ихээхэн хүндрэл бэрхшээл тулгарчээ.

Мягмар гарагт нийслэл Дэли хотод агаарын температур цельсийн +47,6 хэмийг заажээ. Улсын хойд бүс нутаг даяар цаг уурын халуун урсгал дайрч, ихэнх нутгаар өндөр халсан байна. Энэ долоо хоногийг дуустал хэт хална гэдгийг албаныхан ард иргэдэд сэрэмжлүүлжээ.

Цаг агаарын хамгийн халуун температур Ражастан мужийн Чуру хотод цельсийн +50 хэмд хүрсэн байна. Ард иргэдийг хэт халуунд гэрээсээ гарахгүй байхыг анхаарууллаа.

Цаг уур судлаачид дэлхийн цаг уурын өөрчлөлтэй холбогдуулан энэ жил урьд өмнөх жилүүдтэй харьцуулахад илүү халуун байгааг онцоллоо. Хэт халж байгаа нь супер хар салхи Амфан өнгөрсөн долоо хоногт далайн эргийн бүсийг дайран өнгөрсөнтэй холбоотой гэж үзэж байна.

Халуунаас болж алслагдсан бүс нутагт иргэд амь насаа алдсан тохиолдол олон гардаг ч одоогоор тийм тохиолдол бүртгэгдээгүй. Гэхдээ хорио цээрийн дэглэмтэй холбогдуулан тосгон дахь гэртээ буцахын тулд олон зуун км-ыг алхаж туулж байгаа иргэд хүнс, ундны усны хомсдолд орохоос гадна хэт халуунд нэрвэгдэх эрсдэлтэй байна.

Эх сурвалж: CNN