ДЭМБ: Коронавирус ДОХ-той ижил нутагшиж болзошгүй

Дэлхийн эрүүл мэндийн байгууллагын зүгээс коронавирус нь ХДХВ/ДОХ-той ижил олон нийтийн дунд хэвшиж нутагшсан халдварт өвчин болон үлдэх тул арилахгүй байж болзошгүй хэмээн анхааруулсан байна.

Лхагва гарагт ДЭМБ-ын онц байдал хариуцсан салбарын захирал доктор Майк Райн энэ талаарх таамгаа дэвшүүлжээ. Райны хэлснээр урьдчилан сэргийлэх тарилга гаргаж авсан ч вирусийн тархалтыг хянахад асар их хэмжээний хүчин чармайлт шаардагдах ажээ.

Одоогоор дэлхийн 4,4 сая гаруй иргэн халдварлаж, 300,000 орчим иргэн тус вирусийн улмаас нас бараад байна.

Женев хотоос хийсэн цахим хэвлэлийн хурал дээр доктор Райн үргэлжлүүлэн ярихдаа коронавирус нь нутагшмал вирус болон үлдэж, хэзээ ч устаж үгүй болохгүй байж магадгүй гэжээ. Тухайлбал ХДХВ/ДОХ хүн төрөлхтөний дунд нутагшмал вирус болон тархсаар байгаатай ижил хэмээн ярьсан байна.

Одоогоор дэлхий дээр ямар ч судалгааны байгууллага, баг, мэргэжилтнүүд Ковид-19-ийн тархалт хэзээ дуусахыг таамаглаж чадаагүй. Гэхдээ 100 гаруй вакцины туршилт хийгдэж байгаа гэж ДЭМБ мэдээлжээ.

Эх сурвалж: ВВС