Д.Өлзийсайхан: Коронавирусийн гурван шинж тэмдэг илэрсэн тул тусгаарласан

Архангай аймагт коронавирусийн сэжигтэй тохиолдол илэрсэн байж болзошгүй учраас өнөөдөр /2020.01.27/ тус аймгийн Онцгой комисс хуралдсан байна.

Энэ талаар Архангай аймгийн Нэгдсэн эмнэлгийн дарга Д.Өлзийсайханаас тодрууллаа. Тэрбээр “Манай аймгийн харьяат 46 настай эрэгтэй энэ сарын 26-ны үдээс хойш эмнэлгийн байгууллагад хандсан. Тэрбээр халуунтай, ханиалгах, цээжээр нь хөндүүрлэх шинж тэмдэг илэрсэн тул ЭМЯ-наас өгсөн удирдамжийн дагуу коронавирусийн анхан үеийн гурван шинж тэмдэг илэрсэн гэж үзэн тусгаарласан. Ингээд тухайн иргэнээс шинжилгээ аван өчигдөр ХӨСҮТ-руу явуулсан. Өнөөдөр ХӨСҮТ-т шинжилгээний хариу очин шинжлээд 72 цагийн дотор хариу мэдэгдэх байх” гэсэн юм.

-Тухайн иргэний хувьд биеийн байдал хэр байна вэ?

-Өчигдөр ханиалгах, халуунтай байсан. Өнөөдрийн байдлаар биеийн байдал сайжирч халуун буурсан байна. 

-Тухайн иргэн гадаад орон руу зорчсон гэх мэдээлэл байсан?

-46 настай эрэгтэй энэ сарын 1-3-ны хооронд Хонконг улс руу гурван өдөр ажлаар яваад энэ сарын 3-нд МИАТ-ын онгоцоор ирсэн гэсэн.

-Тухайн иргэний хувьд хэзээнээс биеийн байдал муудсан гэсэн бэ?

-Хонконг явахаас өмнө ханиалгаж байсан гэсэн. Ингээд Монголд ирээд даарсан тул ханиад нь хүндэрсэн гэж тухайн иргэн бидэнд хэлсэн. Бид шаардлагатай бүх арга хэмжээг аван одоогийн байдлаар тусгаарлан эмчилгээ хийж байна. ЭМЯ, МХЕГ, ХӨСҮТ-ийн өгсөн удирдамжийн дагуу ажиллаж байна.

ДЭМБ-аас өвчний нууц үе нь 7-14 хоног гэж зарлаад байгаа билээ.