ВИДЕО ТОЙМ: Өнөөдөр манай 4 бөх дагах барилдаан хийнэ

Бөхийн төрлүүдийн 23 хүртэлх насны дэлхийн аварга шалгаруулах тэмцээн Унгар улсын Будапешт хотноо зохион байгуулагдаж байна.

Өчигдөр тэмцээний хоёр дахь өдөр эрэгтэйчүүдийн -57кг, -65кг, -70кг, -79кг, -97кг жингүүдийн дагах барилдаан, мөн түүнчлэн эрэгтэйчүүдийн -61, -74, -86, -92, -125 кг-ын жингийн урьдчилсан болон хагас шигшээ барилдаан явагдлаа. Манай улсаас дагах барилдаанд -57кг жинд З.Занабазар, -70кг жинд Э.Тэмүүлэн барилдсан ба бүх барилдааны бичлэгүүдийг үзэхийг хүсвэл энд дарна уу. 

“Будапешт-2019” бөхийн төрлүүдийн 23 хүртэлх насны ДАШТ-ий хоёр дахь эрэгтэйчүүдийн 61, 74, 92, 125 кг-ын жингийн урьдчилсан болон хагас шигшээ барилдаанууд боллоо. Энэ өдөр манай таван бөх хүч үзсэнээс 74 кг-д “Алдар” спорт хорооны тамирчин ОУХМ Б.Бямбадорж, 86 кг-д ОУХМ Г.Ганхуяг, 92 кг-д “Хангарьд” спорт хорооны тамирчин ОУХМ М.Цогтгэрэл, 125 кг-д “Даян” дэвжээний тамирчин ОУХМ М.Лхагвагэрэл нарыг ялсан бөхчүүд шигшээд шалгарсан тул маргааш дагаж барилдана. Харин 61 кг-д ОУХМ Ц.Чинзоригийг ялсан Армений бөх хагас шигшээд Энэтхэгийн Равиндерт ялагдснаар дагах барилдаан хийх боломжгүй болсон. Ингээд манай бөхчүүдийн хэрхэн барилдсан барилдааны тоймыг толилуулж байна. 

ЭРЭГТЭЙЧҮҮДИЙН -74кг жинд Б.Бямбадорж:

ОУХМ Б.Бямбадорж 1/8 шигшээд Кыргызстаны Мансур Сыргак-Уулуг 7:2-оор яллаа.

Тэрбээр 1/4 шигшээд энэ жилийн Азийн АШТ-ий хүрэл медальт Ираны Мохаммад Нокходид 6:10-аар ялагдлаа. Түүнийг ялсан Ираны бөх шигшээ барилдаанд шалгарсан тул манай бөх өнөөдөр дагах барилдаан хийх эрхтэй боллоо.  

ЭРЭГТЭЙЧҮҮДИЙН -86кг жинд Г.Ганхуяг:

Насанд хүрэгчдийн Азийн АШТ-ий хүрэл, 23 хүртэлх насны ДАШТ болон Азийн аваргын хүрэл медальт ОУХМ Г.Ганхуяг тэгшигтэлийн барилдаанд Румыний Николае Палахиаг оноогоор цэвэр (11:0) яллаа.

1/8 шигшээд өнгөрсөн жилийн залуучуудын ДАШТ-ий хүрэл медальтай эзэн орны Патрик Журовскиг 11:0-ээр ялж шөвгийн наймд шалгарлаа.

1/4 шигшээд энэ жилийн Азийн аварга, өнгөрсөн жилийн 23 хүртэлх насны дэлхийн аварга Ираны Камран Гасемпуртай хүч үзлээ. Өнгөрсөн жил Бухарестэд болсон 23 хүртэлх насны ДАШТ-ий хагас шигшээд Ираны бөхтэй тааран барилдаж дийлдэж байсан бол энэ удаа 0:3-аар ялагдав. Ираны бөх шигшээд шалгарсан тул Г.Ганхуяг өнөөдөр дагах барилдаан хийнэ. 

ЭРЭГТЭЙЧҮҮДИЙН -92кг жинд М.Цогтгэрэл:

Залуучуудын болон 23 хүртэлх насны Азийн АШТ-ий хүрэл медальт, “Хангарьд” спорт хорооны тамирчин ОУХМ М.Цогтгэрэл тэгшитгэлд Канадын Жереми Пуарьег 8:5-аар яллаа.

1/8 шигшээд 2018 оны Оросын аварга, энэ жилийн “U-23”-ын Европын аварга, ОХУ-ын Батырбек Цакуловт 0:10-аар ялагдаж улмаар ОХУ-ын бөх цааш шигшээд шалгарсан тул М.Цогтгэрэл өнөөдөр дагах барилдаан хийнэ. 

ЭРЭГТЭЙЧҮҮДИЙН -125кг жинд М.Лхагвагэрэл:

Залуучуудын болон 23 хүртэлх насны Азийн дэд аварга ОУХМ М.Лхагвагэрэл эхний барилдаанд Кыргызстаны Музаффар Жаппуевыг оноогоор цэвэр ялсан. 

 1/8 шигшээд ОХУ-ын Виталий Голоевтой хүч үзэж 2:3-аар тун харамсалтай ялагдлаа. Ингэснээр манай бөх өнөөдөр манай бөх дагах барилдаан хийхээр боллоо.