Сирийн арми Туркийн дайралт хийсэн бүс нутаг руу цэргээ илгээнэ

Сири улсын Засгийн газар курдуудтай зөвшилцөлд хүрснээр Туркийн армийн дайралт хийж буй хойд хилийн бүс нутаг руу цэргээ илгээхээр болжээ. Сирийн төрийн мэдлийн телевизээр энэ тухай дамжуулахдаа Засгийн газрын армийн бие бүрэлдэхүүнийг хойд нутагт тараан байршуулна гэв.

Хилийн дагуу цэргийн дайралт явуулснаар олон арван энгийн иргэн амиа алдаад байна. Курдуудын толгойлдог Сирийн ардчилсан хүчин Турктай хиллэдэг бүс нутагт хяналтаа тогтоосон ч АНУ эндээс цэргээ татсанаар Ерөнхийлөгч Режеп Тайип Эрдоганы арми галлаж эхэлсэн.

Уг дайралт, зэвсэгт мөргөлдөөний үеэр Айн Исса лагерьт хоригдож байсан Исламын улс бүлгийн 800 гаруй холбоотон зугтсан гэжээ. Олон улсын байгууллага, хамтын нийгэмлэгийн хамгийн их сэтгэл зовниж буй зүйл нь Туркийн дайралт Исламын улс бүлгийнхэнд хүчээ нэгтгэх том боломж олгоно хэмээн болгоомжилж буй явдал юм.

Гэвч Эрдоганы цэргүүд Сирийн хилээс дотогшоо 30-35 км-т аюулгүй бүс бий болгохын тулд террористуудын эсрэг тэмцэж байна хэмээн байр сууриа хамгаалсан. Түүнчлэн аюулгүй бүс байгуулвал Сирийн гурван сая гаруй дүрвэгчийг Турк улсаас гаргаж уг бүсэд байршуулахаар төлөвлөжээ.

НҮБ-аас зэвсэгт мөргөлдөөний улмаас 160,000 гаруй иргэн орон гэрээсээ дүрвэсэн гэж мэдээлжээ.

Эх сурвалж: www.bbc.com