Туркийн цэргийн ажиллагаанаас Сирийн 100,000 орчим иргэн дүрвэжээ
НҮБ-ын мэдээлснээр Туркийн арми хилийн дагуу галлаж эхэлснээс хойш өнөөдрийн байдлаар Сирийн 100,000 орчим иргэн орон гэрээсээ дүрвэж зугтсан байна. Хассаке хот, Таль Тамер тосгоны барилга, сургуулиудад иргэд олноороо хоргодож байна гэжээ.
Олон улсын хүмүүнлэгийн байгууллагын мэдээлснээр багадаа 11 иргэн амиа алдсан байна. Мөн Сирийн Ардчилсан хүчний олон арван дайчны амь эрсэджээ.
Турк улстай хиллэдэг Сирийн хойд бүсийн нутаг дэвсгэрээс АНУ цэргээ татсанаар Эрдоганы Засгийн газарт цэргийн ажиллагаа явуулах ногоон гэрэл асаасан хэмээн эх сурвалжууд дурдаж байгаа юм. Туркийн Засгийн газар цэргийн ажиллагааг аюулгүй бүс байгуулах зорилготой хэмээн байр сууриа хамгаалж байгаа ч энэ нь Исламын улс зэвсэгт бүлэгт томоохон тус хүргэж болзошгүй хэмээн олон улсын хамтын нийгэмлэг сэтгэл зовниж байна.
Баасан гарагт ирүүлсэн мэдээллээр Исламын улс хилийн Камишил тосгонд автомашинтай бөмбөг дэлбэлж зургаан иргэн алагджээ.
Хэрэв Турк улс дайралтаа үргэлжлүүлбэл хилийн бүс орчимд багадаа 450,000 иргэн орон гэрээсээ дүрвэж болзошгүй хэмээн мэдээлж байгаа юм.
Эх сурвалж: www.bbc.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.