Индонезийн Аюулгүй байдлын сайд руу зэвсэгтэй этгээд халдаж хүндээр шархдуулжээ
Индонезийн Аюулгүй байдлын сайд руу үл таних зэвсэгтэй этгээд халдаж амь насыг нь хороохыг завджээ. Ерөнхийлөгчид нэр дэвшиж байсан цэргийн командлагч 72 настай Виранто хэвлийдээ хоёр удаа хутгалуулж хүнд шархдуулсан байна.
Сайд хутгалуулах үедээ Бантен мужид машинаасаа бууж байсан гэж эх сурвалж дамжуулжээ. Түүн рүү халдсан этгээд Исламын улс зэвсэгт бүлгийн нэрийг барьж, тэдний даалгавраар халдлага үйлдсэн гэж цагдаагийн газар мэдээлсэн байна.
Халдлагын үеэр сайдаас гадна цагдаагийн офицер, хэргийн газарт байсан хоёр хүн гэмтэж шархаджээ. Мөн хэргийг хөндлөнгөөс ажиглаж байсан эрэгтэй, эмэгтэй хоёрыг сэжигтнээр татан баривчилсан байна. Сайд Вирантог нисдэг тэргээр нийслэл Жакартагийн эмнэлэгт хүргэжээ.
Тус улсын цагдаагийн газрын мөрдөн шалгалтаар гэмт этгээд Исламын улс бүлэгтэй сүлбэлдсэн Жамах Аншарут Даула бүлэглэлийн гишүүн байж болзошгүй гэж үзсн байна. ЖАД бүлэглэл нь дэлхийн хамгийн их исламын шашинтай иргэн амьдардаг Индонези улсад үйлдэгдсэн хэд хэдэн ноцтой гэмт хэрэг, халдлагуудыг үйлдсэн байдаг. Тухайлбал 2018 онд сүмд болсон халдлагын үеэр 13 иргэн амиа алджээ.
Нөгөө талаар энэ удаагийн халдлага өнгөрсөн дөрөвдүгээр сард болсон сонгуулиар дахин сонгогдсон Ерөнхийлөгч Жоко Видодогийн тангараг өргөх ёслолыг эсэргүүцсэн үйлдэл байж магадгүй гэжээ. Тэрээр энэ сарын 20-ны өдөр тангаргаа өргөх юм.
Дахин сонгуулийн дараа Жакарта хотод Видодог эсэргүүцсэн иргэдийн жагсаал газар авч зургаан хүн амиа алдаж, 200 гаруй хүн гэмтэж бэртсэн.
Эх сурвалж: www.bbc.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.