ВИДЕО: Улс төрийн төрийн золиос болсон жүдоч

Спорт бол хувь хүн талаасаа эрүүл чийрэг бие бялдар, эрүүл амьдралын хэв маяг байдаг бол олон улсын тавцанд энх тайвны бэлэг тэмдэг болдог билээ.

Гэсэн хэдий ч хэдийнээс олон улсын тавцанд улс орнуудын өрсөлдөөн, бүр цаашлаад улс орнуудын манлайллын төлөөх "цусгүй дайны талбар" байсаар ирсэн нь нууц биш. Ердөө хэдхэн хоногийн өмнө жүдо бөхийн дэлхийн аварга шалгаруулах тэмцээнд Израиль болон Иран гэсэн хоёр орны улс төрийн тэмцэл хурцаар илэрлээ. Бөхийн орон гэгддэг Иран улсаас цорын ганц бөх зодоглосон нь 2017 оны дэлхийн аваргын хүрэл, 2018 оны дэлхийн аварга Саиед Моллайе юм. Тэрээр -81кг жинд дэлхийн чансааг тэргүүлэн барилдсан шилдэг жүдоч. Гэвч Ираны засгийн газраас улс төрийн явцуу шалтгаанаар тамирчдаа Израилийн бөхчүүдтэй барилдахыг хатуу хориглосоор ирсэн. Энэ жилийн дэлхийн аварга шалгаруулах тэмцээний үеэр Саиед Моллайе бүхий л өрсөлдөгчөө цэвэр ялж хагас шигшээд шалгарсан юм. Хэрэв хагас шигшээд өрсөлдөгчөө ялбал аваргын алтан медалийн төлөө засгийн газрынхаа "өстөн дайсан" болох Израилийн бөхтэй барилдахаар байлаа. Гэвч түүнийг дэвжээнээ гарахын өмнө засгийн газраас нь дарамтлан барилдахыг хориглосон байна.

Тэрээр тэмцээний дараа өөрөө youtube сувагт байршуулсан ярилцлагадаа: "Би дэлхийн аваргаа батлахын тулд маш их бэлтгэл сургуулилт хийсэн. Өнөөдөр би бүх өрсөлдөгчдөө ялсан. Энд Олимпын аварга ч байлаа. Дэвжээнд гарахаас минь өмнө Ираны үндэсний олимпын хороо болон Спортын яамны сайд утсаар холбогдож барилдахаа боль гэж заналхийлсэн. Би гэр бүлийнхнийхээ төлөө маш их санаа зовж, айж байна. Би ирэх олимпд Олон улсын Олимпын хорооны далбаан дор оролцож Олимпын аварга болохыг хүсэж байна" хэмээн ярьжээ.