Өчигдөр фэйсбүүкт И.Булган гэх хаягтай эмэгтэй ХУД-ийн хүүхдийн эмчийн буруутай үйл ажиллагаанаас болж нэг настай дүү минь хүнд гэмтсэн гэх постыг оруулсан олон нийтийг цочирдуулсан үйл явдал болсон. Уг мэдээллийн дагуу ХУД-ийн хүүхдийн эмнэлгийг Эрүүл мэндийн яамны ажлын хэсэг шалгаж эхэлжээ. Тус яамны хэвлэлийн төлөөлөгч “Ажлын хэсгийн дүгнэлт удахгүй гарна. Тэгэхээр албан ёсны мэдээлэл өгнө” гэв. Бид энэ асуудлаар НМХГ-аас ямар ажил хийж байгааг тодруулахад “Хохирогч хүүхдийн ар гэрийн зүгээс мэргэжлийн хяналтын байгууллагад албан ёсоор гомдол мэдээлэл гаргаагүй. Гэхдээ олон нийтийн сүлжээгээр тархсан дуулиантай мэдээллийн дагуу Хан-Уул дүүргийн мэргэжлийн хяналтын газраас бүрэлдэхүүн гаргаж, алдаа гаргасан гэх  эмнэлгийн байгууллагыг шалгаж байгаа. Албан ёсны дүгнэлт гарахаар мэдээлэл өгнө” гэлээ.

---