Японд өнгөрсөн онд 568 хүүхэд амиа хорложээ

Япон залуучуудын амиа хорлолтын шалтгаануудын жагсаалтад сургуультай холбоотой асуудал толгой цохиж байна. Тус улсын өсвөр насны /10-19 насны/ 568  залуу өнгөрсөн онд амиа хорлосон бөгөөд тэдний 188 нь амиа хорлож буй шалтгаанаа сургуультай холбон тайлбарлажээ. Мөн 119 нь эрүүл мэндийн шалтгаанаар, 116 нь гэр бүлийн асуудлаас болж амиа егүүтгэжээ.

Амиа хорлож байгаа хүүхдүүдийн дийлэнх нь ахлах сургуулийн сурагчид байгаа бөгөөд энэ байдал жилээс жилд өсч байгааг Японы Засгийн газар судалгаагаар тогтоосон байна.

Бусад хүүхдэд дээрэлхүүлж амиа хорлох талаар бодож явсан нэгэн сурагч 2015 онд CNN-д ярилцлага өгөхдөө, “зуны амралт болж хүүхдүүд гэртээ байдаг. Энэ нь дээрэлхүүлдэг хүүхдүүдийн хувьд диваажин л гэсэн үг. Гэвч зуны амралт дуусч хичээл ороход тэд дахин дээрэлхүүлэхээс айж, улмаар амиа хорлодог" гэж хэлсэн байна.

Өмнөд Солонгосын сурагчдын гуравны нэг нь амиа хорлох тухай боджээ

Өмнөд Солонгост сурагчдын гуравны нэг нь амиа хорлох тухай бодсон байдаг аж. Үүний хамгийн том шалтгаан нь хичээлийн хэт их ачаалал бөгөөд нийт судалгаанд оролцсон сурагчдын 37.2 хувь нь ингэж хариулсан юм. Харин 21.9 хувь нь ирээдүйн ажил амьдралынхаа тухай эргэцүүлэх үед гэсэн бол 17.9 хувь нь гэр бүлийн асуудлаасаа болж амиа хорлох тухай боддог байна. Эдгээр сурагчдын 28.6 хувь нь амиа хорлох тухай хааяа боддог бол 5.2 хувь нь үргэлж амиа хорлох тухай боддог хэмээн хариулжээ.

Манай улсын сурагчид хүртэл амиа хорлох тухай нухацтай боджээ

Монгол Улсын хувьд өнгөрсөн таван жилд амиа хорлолтын 2055 тохиолдлоос 605 нь 10-14 насны буюу өсвөр насныхан байсан байна.

Сурагчдын дунд явуулсан асуулгаар, сүүлийн 12 сарын хугацаанд амиа хорлох талаар нухацтай бодож байсан гэж хариулсан нь судалгаанд хамрагдагчдын 26.1 хувь, амиа хорлохыг завдаж байсан гэж 10.7 хувь нь хариулсан байдаг.

Аравхан настай хүү, 12-хон настай охин насанд хүрсэн эрүүл хүний толгойд ч багтамгүй аймшигт шийдвэрийг гаргаж байгаа нь зөвхөн тухайн гэр бүлийн биш нийгмийн эмгэнэл юм. Хүүхдүүдийн хариулсан байдлыг судалгааны тоон үзүүлэлтэй харьцуулаад  харахад дан ганц томчууд биш хүүхдүүд сэтгэцийн тулгамдсан асуудалтай, гарах гарцаа мэдэхгүй байгаа нь ажиглагдаж байна хэмээн судлаачид онцолж байна.

Эх сурвалж: japantimes.co.jp, koreatimes.co.kr

---