Мэргэжлийн снукер биллиардын зөвхөн шилдгүүд урилгаар оролцдог 50 дахь удаагийн Мастерс тэмцээн амжилттай зохион байгуулагдаж өндөрлөлөө. 

1975 оноос эхлэлтэй, зөвхөн шилдгүүдийг урилгаар оролцуулдаг мастерс тэмцээн нь чансааны оноо олгодоггүй ч дэлхийн аварга шалгаруулах тэмцээний дараа эрэмбэлэгдэх нэр хүндтэй тэмцээн юм.

Өнөөдрийг хүртэл тус тэмцээнд хамгийн олон түрүүлсэн тамирчин бол мэдээж энэ цагийн домогт Ронни О Сулливан аварга долоон удаа түрүүлээд байсан ба 2024 оны мастерс тэмцээнд найм дахь түрүүгээ хүртлээ. Тэрээр мастерс тэмцээнд 1995 онд анх түрүүлэхдээ ердөө 19 настай байсан нь хамгийн залуудаа мастерсийн аварга болсон рекордыг эзэмшдэг ба энэ жил 48 насандаа түрүүлснээр мастерст түрүүлсэн хамгийн ахмад тамирчин рекордыг мөн эзэмших боллоо. Шигшээ тоглолтод Ронни аварга Али Картертай хүч үзэн 10:7 харьцаагаар ялалт байгуулсан юм.

Энэ удаагийн мастерс тэмцээний бас нэгэн онцлог нь снукер биллиардын хамгийн дээд оноо болох 147 оноог хоёр тамирчин авсан нь мастерс тэмцээний түүхэнд анхны тохиолдол боллоо. Урьд нь ердөө гурван тамирчин мастерс тэмцээнд 147 оноо авч байсан нь 1984 онд Кирк Стевенс, 2007 онд Дин Жунхуй, 2015 онд Марко Фу нар байлаа. 

Энэ жилийн мастерсийн эхний 147 оноог Дин Жунхуй эхний тойрогт авсан ба бид энэ талаар өмнө нь мэдээлсэн билээ. 

Тэгвэл хоёр дахь 147 оноог Марк Аллен шөвгийн наймд Марк Селбитэй өрсөлдөж байхдаа авсан байна. Энэ нь Марк Аллений карьерын гурав дахь 147 оноо бөгөөд өмнө нь буюу 2016 онд UK Championship, 2021 онд Northern Ireland Open тэмцээнүүдэд 147 оноо авч байсан юм. 

Бас нь нэгэн түүхэнд тэмдэглэгдэн үлдэх тоглолт гарсан нь Марк Аллен болон Али Картер нарын хагас шигшээ тоглолт байлаа. Тодруулбал Али Картер энэ тоглолтод гурав дараалсан өрөгт 100-аас дээш оноо /100, 101, 105/ авсан нь Мастерсийн түүхэнд өмнө нь гарч байгаагүй юм.