UBS телевизийн ээлжит уран бүтээл “Хайрын домог” уран сайхны кино тавдугаар сарын 10-нд нээлтээ хийнэ.

"UBS Pictures" компани дэлгэцийн 10 гаруй уран бүтээлийг олны хүртээл болгож, үзэгчдийн таашаалыг хүртсэн юм. Тус компанийн “Содура”, “Говийн домог”, “Нарны садан” бүтээлүүд нь үндэстний өвөрмөц онцлог бүхий соёл уламжлалын сэдвүүдээр цаг үеэ олсон, даацтай, урлаг гоо зүйн хэмжүүрт бүрэн нийцүүлсэн байдгаараа ялгардаг билээ.

Уг кинонд Монголын залуу идэр үеийн авьяаслаг жүжигчид болох Д.Мөнхтөмөр, Т.Сэлэнгэ, М.Тогтохжаргал, Т.Лхагвадулам, ОХУ-ын Ардын жүжигчин, Буриадын ардын болон гавьяат жүжигчин нарын алдартай, туршлагатай жүжигчид тогложээ.

Хэнтий аймгийн Дадал суманд үндсэн зураг авалтыг нь хийж, түүнчлэн Төв аймгийн Алтанбулаг, Батсүмбэр сумын нутгуудад буухиачлан зураг авч дөрвөн улирлын өнгө илэрхийлэл бүхийгээрээ онцлог юм.

"Хайрын домог" кино бол буриад ард түмний ахуй соёл, домог, өвөрмөц хэв шинж, сэтгэлгээний онцлог, оюун санааг туульсын уран сайхны арга хэлбэрээр хүний амьдрал, тэмцэл, өшөө хорсол, хайр дурлал, өгөөмөр сэтгэл, уудам санааг хослуулан өгүүлснээр үзэгчдийн сонирхол таашаалд нийцнэ гэж итгэж байна.

---