Балбын Гуржа ууланд авирч байсан есөн уулчин амиа алдсаны дунд Өмнөд Солонгос улсын уулчид байсныг Гадаад хэргийн яамнаас нь мэдэгдлээ. Орон нутгийн иргэд болон цагдаа нар хүчтэй цасан шуурганы үеэр амиа алдсан иргэдийн цогцосыг уулнаас буулгаж Балбын нийслэл Катманду хотод авчрахаар ажиллаж байна.

Хималайн нурууны ноён оргилд авирахаар замдаа гарсан есөн уулчин өнгөрсөн долоо хоногийн баасан гарагт хүчтэй цасан шуурганы дараа ор сураггүй болоод байжээ. Бямба гарагт зарим цогцосны байршлыг тогтоож, ням гаригийн өглөө 7:15 минутанд нисдэг тэргүүдийг эрэлд явуулж, хоёр цагийн дараа есүүлэнг нь амиа алдсан байдалтай олжээ.

 

Амь үрэгдсэн уулчдын яс нь хугарсан, толгой тархи нь гэмтсэн байна. Тэдний 7,193 метрийн өндөрт байрлаж байсан баазад бөмбөг дэлбэлсэн мэт болжээ. Амиа алдсан есөн уулчны тав нь Өмнөд Солонгосын, дөрөв нь Балбын иргэд байсан байна.

Өмнөд Солонгос улсын Ерөнхийлөгч Мүн Жэ Ин амиа алдсан уулчдын ар гэрийнхэнд эмгэнэл илэрхийлжээ. Уулчдыг лхагва гаригийн өглөө Сөүлд авчирна гэжээ. Тэдний дунд алдарт тамирчин, рок од Ким Чан Хо болон түүний багийнхан байжээ.

Гуржа уулын ноён оргилд хүрэх 45 хоногийн хугацаатай аяллаа есдүгээр сарын 11-ний өдөр эхлүүлсэн байна. Ким Чан Хо нь Хималайн нурууны 8,000 метрээс дээш 14 оргилд хүчилтөрөгчийн баггүй гарсан бөгөөд түүний эр зориг, хөдөлмөрийг үнэлэн Олон улсын уулчдын холбооноос шагнаж байжээ.

Амиа алдсан уулчдын зорьсон Гуржа уулын оргилд түүхэндээ 30 хүн л хүрсэн байдаг гэнэ. Хамгийн сүүлд 1996 онд тус оргилд хүний мөр гарчээ.

 

Эх сурвалж: www.cnn.com  

---